Aksyon!
Imajine w, nan 17èm syèk la, Cap-Français te kapital espas joyografik nou rele jounen jodi, kontinan "Ameriken!" Enben wi, yè bastyon sivilizasyon an mouvman nan epòk kolonyal yo te rele "Cap-Français;" jodi a, se New York City. Sa vle di, Cap-Français (Cap Haïtien) te vil ki te pi avanse nan epòk kolonyal yo. Se la tou anpil premye eksperyans syantifik te lanse. Mwen ta renmen aprann ou, se sou tè Ayiti, nan ane 1740, Teyat te soti an Ewòp (Paris, France), epi li te vin renouvle l anndan Cap-Français, Saint-Domingue. An 1791, apre sèn dramatik seremoni Bwa Kayiman ki te kondui a Revolisyon Boukmann, mouvman teyat la te gaye kò li sou tout lajè kontinan Amerik la. An konsekans, teyat te fleri nan Nò kou nan Sid Amerik. Sa vle di, apre laGrès, atizay teyat la genyen yon dezyèm bèso, Ayiti! Wi, Ayiti!
Ayisyen eritye yon atizay enpòtan. Atisay sa a se yon kokennchenn miwa ki dwe sèvi nasyon Ayisyen an kòm yon miwa pou li gade tèt li. Pa ekzanp, nan Aksyon (ki ekri an Kreyòl/Franse), genyen sèt (7) pyès teyat. Si w konn pale Kreyòl ayisyen an, w ap rive konprann lè yo di w, "Sèt di sèten." Wi, se sèten w ap fini pa dekouvri vrè kwayans ki ap gide ideyal ou antan yon nasyon. Se sèten ou ap fini pa konprann poukisa menm mizik ou enfliyanse emosyon ou, konpòtman ou, e menm moral ou antan yon sitwayen: Aksyon dekri karaktè w.