Buku leyi yi vulavula hi Rhandzu loyi a tshama eka Muzilela eku sunguleni kambe eku heteleleni a tshama eka Xihoko. Rhandzu i nhwanyana loyi a rhandza ngopfu vavanuna kun'we na byalwa. Exikolweni u vile a rhandzana na Madume tatana wa n’wana wa yena wo sungula. Madume a ri mudyondzisi wa nkarhinyana kwale xikolweni xa ka Muzilela naswona a tshama eka Ramotshinyadi. Madume hi nkarhi lowu a nga rhandzana na Rhandzu hi wona a ri na nsati ekaya. Madima nsati wa yena u te loko a ta va a kumile mhaka ya leswaku Madume u rhandzana na Rhandzu o vheta a longa nhundzu ya yena hinkwayo a tlhelela eka rikwavo.
Madume u sarile a tshembherile eka Rhandzu tanihi leswi se a va ri na n'wana swin’we naswona Madume a vona o nge Rhandzu hi yena a n'wi rhandza ngopfu ku tlula nsati wa yena kambe endzhaku ka ku famba ka nsati wa yena u vile a swi vona leswaku Rhandzu loyi a tshembherile eka yena a nga na ntiyiso naswona a nga tshembhekangi.
Rirhandzu ra vona ri tile ri ta hela laha Madume a ya nga ya a ya kuma Rhandzu na MaJeff wa le ka Mayepu va ri karhi va ntswontswana eTzaneen. Ku sukela siku rero Madume u vonile swi antswa leswaku a hambana na Rhandzu a vheta a landza nsati wa yena a ya kombela ku rivaleriwa eka nsati wa yena Madima a vuya ekaya. Loko a ri Rhandzu yena u vile a ya emahlweni na rirhandzu ra yena na Majeff hambi leswi na yena MaJeff swi nga vuya swi n'wi fayela muti.
MaJeff u vile a akela Rhandzu muti exihundleni laha Nyeleti nsati wa yena a nga swi tivi.Kambe siku leri Nyeleti a nga swi tiva hi rona u lo vheta a longa nhundzu ya yena hinkwayo a tlhelela eka rikwavo. Majeff u vile a sala na hlomisa ra yena Rhandzu .MaJeff na yena u vile a sungula ntirho wa yena wo ka a nga ha etleli ekaya laha Rhandzu a nga kala a lan'wa a tlhelela eka Xihoko.
MaJeff hi ku vona Rhandzu a nga ha pfumeli ku vuya emutini u yile a ya kombela ku teka n’wana tanihi leswi Rhandzu a nga swi koti ku tihlayisela kahle n'wana wakwe hikwalaho ko famba ngopfu na vavanuna ku vuya ka yena hi le ka MaJeff u lo vheta a nyanya ku ya emahlweni no rhandza vavanuna vo tala hi nkarhi wun'we hambi leswi vavanuna hinkwavo va yena a va nga tivani. Wun’wana na wun’wana a tiva Rhandzu ku ri munhu wa yena a ri yexe.
Endzhaku ka ku lova ka Kwatisa mana wa yena ndlala yi vile yi nghena laha Rhandzu a nga kala a ya tirha emalamuleni eka Mahahela laha a nga fika a rhandzana na Manghilazi ndhunankulu ya kwale ka Mahahela. U tlhele a rhandzana nakambe na Botha matsalana wa kwale malamuleni kun'we na van'wana
Hi ku vona leswaku vavanuna va n'wi nwile moya le malamuleni u vile a tshika a ya tirha eka ZZ2 eMooketsi laha na kona a nga fika a rhandzana na Rikhotso muchayeri wa lori na van'wana vavanuna tanihi leswi a wu ri ntolovelo wa yena. Ku fikile laha ntirho wa vona a wu lava leswaku va famba va ya tirhela etlhelo ra Mesina kambe Rhandzu a nga ha yangi kwalaho hi ku vona leswaku i kule na le kaya.
U yile a ya lava ntirho epurasini ra ka Makepisi Agri kwale Mooketsi.Kona u fikile a rhandzana na Finiyasi murisi wa tihomu ta mulungu kwale. U tlhele a rhandzana nakambe na Xibavana matsalaninkulu wa kwale purasini. Xibavana na Finiyasi a va titeka tanihi maxaka hikwalaho ka leswi swivongo swa vona a swi fana.
Leswi swi endlile leswaku Finiyasi loko vanhu va n'wi byela leswaku Rhandzu u rhandzana na Xibavana a nga pfumeli hikuva a n'wi tshembhile ngopfu naswona a n'wi teka tanihi xaka. Kambe ku fikile laha a nga kala a swi vona hi yexe leswaku hakunene va rhandzana. Finiyasi u lo vheta a huma eka timhaka ta rirhandzu ra yena na Rhandzu.
Endzhaku ka loko Finiyasi a swi tivile Rhandzu u lo vheta a longa nhundzu ya yena hinkwayo a ya tshama endlwini ya Xibavana. Va tshamilenyana nkarhi wo leha Xibavana a nga si vona mitirho ya Rhandzu leyo biha. Leswi a swi vangiwa hi leswi Rhandzu a vulavula na vanhu va yena entirhweni ntsena.
Siku rin’wana Xibavana u nyikile Rhandzu mali ya madzana ntsevu wa tirhandi leswaku a famba na yona ekaya.